BÁLSAMO CASERO

Estamos perdíos
no hay que dali güeltas,
que ya estoy mu jarto
de jechal la cuenta,
y cá ves que güelvo
se me poni dolol de cabeza.

—Quico, no te agines.
—Paecis boba, Cleta,
quedrás que me esponji,
u que baile, u que jaga fachenda,
mentris que la genti
mos jaci esta cuenta:
«Dies al escribano,
deciséis al tío Lucio Candela,
nuevi a la comadri
y ocho a tía Endelencia
sin contal los caíos de hogaño,
que entri tó, pues, se arrima a sesenta».

Y no miento al médico
ni al jerrero, que ya se mos quejan,
ni te meto la renta de hogaño,
ni el trimestri, que ya se mos llega,
que sólo de costas
un duru te cuesta.

¡Estamos perdios...
no hay que dali güeltas!

U se vendi el cachujo de casa,
y en cueros mos quean...

¡U me ajorco y me ajorro de andalmi
jechando más cuentas!

¡Vamos, no esvaríes,
que ni en groma, ni en groma siquiera
debin de mintalsi
brutás como esa!

Y más que las trampas
tampoco te aprietan
pa que asin te agines,
pa que asin de ajogau te veas.

Verdá que se debin
toas esas gabelas,
pero mira, tenemos posibles
pa pagal sin vendel la jacienda.

Treinta duros quiciás la potranca
te vali en la feria,
tres guarrapos, a cinco, son quinci,
y preñá la lichona mos quea,
entri yo y la muchacha otros cinco
mos ganamos jilanda dos telas,
que quiciás esti ivierno poamos
jilal dos y media,
con los burros, a días perdíos,
tú te sacas tres durus de güebres,
y las miajas de rastras que falta
y el réito que sea,
lo paemos matal con jornalis
de la aceitunera,
de los cavucheos
y de la laveria.

Si asperan un año
no se quea a debel una perra,
y en cuenta no meto
lo primero que para la yegua,
que está sentenciao,
pa si al cabo se cesa Teresa,
que hay que jateala
bien de ropa nueva.

¿No ves cómo sali
pa salil de deudas
sin mental la casa
ni decilmos brutás como aquélla?

¡Hora! Ya lo veo;
no sé jechal cuentas,
porque no pienso en esos rinconis
que a ti te se acuerdan.

Lo que jago es ponelme möorro
cuando doy en quereli dal güeltas,
y con estas que tú me has jechao
me has barrío el dolol de cabeza...